2000. urtean sortu zen Vocalia Taldea emakume abesbatza, egungo zuzendari Basilio Astulezen ekimenez. Vocalia Taldeak bidea ematen die Euskal Herriko zenbait emakume musikari profesionalen erronka eta kezkei. Taldearen asmoa da ahots-talde egonkor bat izatea, ekin diezaiokeena ohiko programazioetan nekez entzun daitekeen errepertorio bati, musika eta ahots aldetik exijentzia-maila handikoa delako.

Gaur egun, Araba, Bizkaia, Gipuzkoa eta Nafarroa eta Errioxako bataz besteko 40 abeslarik osatzen dute Vocalia Taldea, den denak eskarmentu handikoak abesbatza musikaren alorrean. Programazio ausartak eta eszenaratze zainduak bitarte, taldea erreferente bihurtu da egungo musika koralaren munduan.

Vocalia Taldeak emakumezkoen korurako errepertorio zabala interpretatzen du, Euskal Herrikoa zein nazioartekoa, eta garai klasikoetatik hasi eta musika garaikideraino. Horrez gain, XX. eta XXI. mendeetako errepertorioen ikerlan sakona egiten du emakumezkoen abesbatzentzako musika berriaren sorkuntza bultzatuz, eta musika-lan sortu berriekin aberasten du bere errepertorioa, abangoardiako konpositoreen ekarpenak lagun.

Vocalia Taldeak lau disko grabatu ditu, Neskatxena, María Mater, Haizeak Dakar eta, 2023an, Guri, Vocalia Taldearentzat berariaz sortutako euskal konpositoreen (Xabier Sarasola, Eva Ugalde, Josu Elberdin, David Azurza, Paula Olaz eta Jon Sáenz) lanak biltzen dituena. Diskoa Donostiako San Telmo museoko kaperan aurkeztu zen, Musikagileak kontzertu zikloaren baitan.

Abesbatzaren sorreratik, Vocalia Taldeak gonbidapen aunitz jaso izan ditu Espainiako eta Europako (Italia, Frantzia, Irlanda, Belgika...) abesbatza jaialdi ugaritan parte hartzeko. Kritikak txalotu egin du ibilbidean ezaugarri nagusia kalitatea, originaltasuna eta berrikuntza dituen taldearen jarduna. Taldea zenbait orkestra, bakarlari eta kultur erakundeekin batera aritu izan da sarritan, eta hogei saritik gora jaso izan ditu nazioarteko lehiaketetan (Tours, Arezzo, Tolosa, Maasmechelen edo Cork).

2019ko azaroan, Gustav Holsten musika eskainiz bost kontzertuko bira bat egin zuen Juanjo Mena zuzendariaren gidaritzapean, Euskadiko Orkestra Sinfonikoarekin eta abonu-programaren barruan.

2020ko iraila eta abendua bitartean, Vocalia Taldeak Le Muse Veneziane programa barrokoa aurkeztu zuen, A. Vivaldi, N. Porpora eta B. Galuppiren musikarekin, Zumarraga, Zenarruza eta Ordiziako antzinako musikako zikloetan, Conductus Ensemblerekin batera, Andoni Sierraren gidaritzapean.

2021ean Madrilen, Azkoitian, Zornotzan, Akizen (Frantzia) eta Gasteizen eman ditu kontzertuak.

There Is No Rose, Benjamin Britten, Johannes Brahms eta Xabier Sarasolaren musikarekin, Gasteizen, Beasainen,eta Bilbon (Arriaga antzokian eta Elkarte Filarmonikoan) aurkeztu da. Kontzertu horietan, Vocalia Taldeak Urtats Elur suitea estreinatu du, Xabier Sarasola konpositoreak taldearentzat idatzi eta Benjamin Britten britainiar konpositore ospetsuaren A Ceremony of Carols Gabonetako musikaren suitearen ispilu gisa sortua.

2022an proiektu berri bat plazaratu zuen, Arima Sakra izenburupean, emakume korurako eta organorako erlijio-errepertorioko hautaketa bat biltzen duena, Felix Mendelssohn, Francis Poulenc eta Kim André Arnesenen lanekin. Programa hau Hondarribiko Erlijio Musikako Zikloan, Burgosen eta, 2023an, Euskadiko Orkestra Sinfonikoaren Miramongo Matinéeen zikloan eta 84. Donostiako Musika Hamabostaldiaren inaugurazio-egunean aurkeztu zen. Programa hau gorpuzteko beharrezkoa izan da taldeak Oscar Rodríguez organistaren eta Nerea González sopranoaren egindako elkarlana.

Alain Antinoglu maisuarekin eta Frankfurteko Irratiko Orkestra Sinfonikoarekin batera, 2022ko abuztuan, Vocalia Taldeak Santanderko Nazioarteko Jaialdian eta Donostiako Musika Hamabostaldian parte hartu zuen Claude Debussyren Sirènes interpretatuz, arrakasta handia izan zuen kritikaren aldetik, baita publikoaren aldetik ere.

2023ko apirilean Vocalia Taldea izan zen Ejea de los Caballeroseko Abesbatza Lehiaketaren 50. edizioko irabazlea. Garrantzia handiagoko edizioa izan zen oraingoa, izan ere, abesbatza parte-hartzaileak aurreko edizioetako irabazleak izan ziren. Saria Vocalia Taldeak eta Basilio Astulez zuzendariak egindako lanaren kalitatearen aitorpen garrantzitsua da. 

2023ko abenduan, Vocaliak aukera izan du Donostiako San Telmo Museoaren kaperan, Musikagileak zikloaren markoan, GURI izeneko azken diskoan grabatutako programa aurkezteko. Musikagileak zikloa Euskal Herriko musika-sorkuntza berriari buruzkoa da.

2024an, Vocalia Taldeak hainbat ekitaldi ospetsutan parte hartu du, hala nola Cuencako Musika Erlijiosoaren Nazioarteko Astean inaugurazio-kontzertua eskainiz eta Vilagarcia de Arousako ClasClas Musika Klasikoaren Nazioarteko Jaialdiaren amaiera-kontzertua emanez.

Aurten Bilboko Musika Música jaialdian parte hartu du Euskadiko Orkestra Sinfonikoarekin batera, Saint Saëns konposatzailearen La Nuit interpretatuz. Halaber, eta orkestra honen abonu-programaren barruan, Debussyren Sirènes interpretatu du Gasteizko Principal Antzokian.

2024ko udan Arima Sakra programa taularatu du berriro Itxas Soinua Nazioarteko Musika Jaialdian, Lekeition (Bizkaia).